கறுப்பு கொடி ஏந்தி பிரதமர் மோடி உருவபொம்மை எரிப்பு: கோவையில் பரபரப்பு

கோவைக்கு வருகை தரும் பிரதமர் மோடியை கண்டித்து கறுப்பு கொடி போராட்டம் நடைபெற்றது. மேலும் மோடி உருவபொம்மை எரிக்கப்பட்டதால் பரபரப்பு ஏற்பட்டது.

கோவை கொடிசியா அரங்கத்தில் தென்னிந்திய இயற்கை விவசாயிகள் கூட்டைமைப்பு சார்பில் நடைபெறும் மாநாட்டில் பங்கேற்க பிரதமர் நரேந்திர மோடி கோவைக்கு இன்று வருகை தர உள்ளார். இதனால் கோவையில் 5 அடுக்குப் பாதுகாப்பு போடப்பட்டுள்ளது. இந்நிலையில் பிரதமர் மோடி வருகையை கண்டித்து, மசக்காளிபாளையம் பகுதியில் முற்போக்கு அமைப்புகள் சார்பில் கறுப்பு கொடி போராட்டம் நடைபெற்றது.

தந்தை பெரியார் திராவிடர் கழக பொதுச்செயலாளர் ராமகிருட்டிணன் தலைமையில் நடந்த போராட்டத்தில் திராவிடர் கழகம், விடுதலை சிறுத்தைகள், ஆதித்தமிழர் பேரவை, திராவிடர் தமிழர் கட்சி, திராவிட இயக்கத் தமிழர் பேரவை, தமிழ் புலிகள் கட்சி, மக்கள் அதிகாரம் உள்ளிட்ட பல்வேறு அமைப்பினர் கலந்து கொண்டனர். இந்த போராட்டத்தில் கலந்து கொண்டவர்கள் மோடியே திரும்பி என்ற பதாகைகளை ஏந்தி கண்டன முழக்கங்களை எழுப்பினர். அப்போது திடீரென பிரதமர் மோடியின் உருவபொம்மை எரிக்கப்பட்டதால் அந்த பகுதியில் பெரும் பரபரப்பு ஏற்பட்டது.

இதனைத் தொடர்ந்து தந்தை பெரியார் திராவிடர் கழக பொதுச்செயலாளர் ராமகிருட்டிணன் செய்தியாளர்களிடம் கூறுகையில், “ஒடிசா, பிஹார் சட்டமன்ற தேர்தல் பிரச்சாரத்தில் பிரதமர் மோடி தமிழர்களை பற்றி இழிவாகவும், அவதூறாகவும் பேசி அவமானப்படுத்தினார். தொடர்ந்து தமிழர்கள் மீது வட மாநில மக்களிடம் வெறுப்பை ஏற்படுத்தும் வகையில் மோடி பேசி வருகிறார். தமிழ்நாட்டிற்கு ஒதுக்க வேண்டிய கல்வி நிதி உள்ளிட்ட நிதிகளை முழுமையாக ஒதுக்கவில்லை. தமிழ் மொழி வளர்ச்சிக்கு மிக குறைந்த நிதியை‌ மட்டுமே பிரதமர் மோடி ஒதுக்கியுள்ளார்.

மேலும், மக்கள் தொகை குறைவாக இருப்பதாக பொய்யான காரணத்தை கூறி, கோவை மெட்ரோ ரயில் திட்டம் ஒன்றிய அரசால் புறக்கணிக்கப்பட்டு உள்ளது. இயற்கை விவசாயத்தை அழிக்கும் வகையில் மரபணு மாற்றப்பட்ட விதைகளை ஆராய்ச்சிக்கு ரூ.500 கோடி ஒதுக்கிவிட்டு, தற்போது இயற்கை விவசாயிகள் மாநாட்டில் கலந்து கொள்ள வருகிறார். அதனால் மோடி வருகையை கண்டித்து போராட்டத்தில் ஈடுபடுகிறோம்” என்றார்.

இந்த போராட்டத்தில் கலந்து கொண்டவர்களை போலீஸார் கைது செய்ய முயன்ற போது அவர்கள் திடீரென சாலை மறியலில் ஈடுபட்டனர். இதனால் அங்கு பரபரப்பு ஏற்பட்டது. இதையடுத்து மறியல் செய்த நூற்றுக்கும் மேற்பட்டோரை போலீஸார் கைது செய்தனர்.

Leave a Reply

Your email address will not be published. Required fields are marked *