டாஸ்மாக் கடையில் தகராறு : மதுரை ஜெய்ஹிந்த்புரம் அருகே ரவுடி அடித்துக் கொலை

மதுரை ஜெய்ஹிந்த்புரம் அருகே மதுபானக் கடையில் ஏற்பட்ட தகராறில் இளைஞர் ஒருவர் கல்லால் அடித்து கொலைச் செய்யப்பட்ட சம்பவம் பரபரப்பை ஏற்படுத்தி உள்ளது.

மதுரை எம்.கே.புரத்தை சேர்ந்தவர் முத்துமணி போஸ். 34 வயதாகும் இவர் மீது அடித்தடி, கட்டப் பஞ்சாயத்து என பல்வேறு குற்ற வழக்குகள் நிலுவையில் உள்ளன.

இந்நிலையில், நேற்று இரவு எம். கே. புரம் பகுதியில் மதுபான கடையில் முத்துமணி மது அருந்தினார். அப்போது, அங்கு மது அருந்திக்கொண்டிருத்த மற்றொரு இளைஞருக்கும், முத்துமணிக்கு இடையே தகராறு ஏற்பட்டதாக கூறப்படுகிறது.

கல்லால் அடித்துக்கொலை

இதில் முத்துமணி அந்த இளைஞரை பயங்கரமாக தாக்கதாக தெரிகிறது. இதையடுத்து மதுரை ஜெயந்திபுரத்தை அடுத்துள்ள எம்கேபுரத்தில் வைத்து நேற்று இரவு அந்த இளைஞர் தனது நண்பர்களுடன் சேர்ந்து வந்து, தனியாக இருந்த முத்துமணியிடம் தகராறில் ஈடுபட்டுள்ளார்.

ஒரு கட்டத்தில் ஆத்திரமடைந்த அந்த இளைஞர் தனது நண்பர்களுடன் சேர்ந்து முத்துமணி போஸை ஓட ஓட விரட்டி, தலையில் கல்லை போட்டு கொடூரமாக தாக்கியுள்ளார். இதில் படுகாயமடைந்த முத்துமணி போஸ் மருத்துவமனைக்கு செல்லும் வழியில் உயிரிழந்தார்.

இச்சம்பவம் குறித்து, மதுரை ஜெய்ஹிந்த்புரம் காவல்துறையினர் வழக்குப்பதிவு செய்து விசாரணை நடத்தி வருகின்றனர்.