திமுகவில் இணைந்ததாக வெளியான செய்தி வதந்தி என்று பொள்ளாட்சி அதிமுக சட்டமன்ற உறுப்பினர் ஜெயராமன் கூறினார்.
இது தொடர்பாக பொள்ளாச்சியில் அவர் செய்தியாளர்களிடம் கூறுகையில், “அதிமுகவை தொடங்குவதற்கு முன்பே எம்ஜிஆரின் கைபிடித்து வளர்ந்த பிள்ளை நான். எம்ஜிஆர் மறைவிற்கு பின் அம்மாவோடு தொடர்ந்து பயணித்தவன். அதிமுக முன்னாள் பொதுச்செயலாளர் ஜெயலலிதா மறைவிற்குப் பிறகு என் உயிர் மூச்சு உள்ள வரையில் எடப்பாடி பழனிசாமியின் பின்னால் அணி வகுத்து நிற்கும் தொண்டர்களிலேயே நானும் ஒருவனாக இருந்து வருகிறேன்.
பொள்ளாச்சி பாலியல் வழக்கில் என்னையும், என் மகனையும் தொடர்புபடுத்தி பிரபல பத்திரிகை ஒன்று செய்தி வெளியிட்டது. இதனால் அந்த ஊடகம் மீது ரூ. 1 கோடி கேட்டு மான நஷ்ட வழக்கு போட்டுள்ளேன். அவ்வழக்கு தற்போது நடக்கத் தொடங்கியுள்ளது. இந்த நிலையில் திமுகவில் நான் இணைந்ததாக செய்தி வெளியானது. இதை மற்ற ஊடகங்களும் பரப்ப துவங்கியுள்ளன. இவர்களை சட்டத்தின் முன் நிறுத்தி கடுமையான தண்டனை வாங்கி தருவேன்.
அதிமுக என்ற இயக்கம் என் உயிரோடும், உணர்வோடும் கலந்தது. உயிர் உள்ளவரை தான் அதிமுகவில் தொடர்ந்து நீடிப்பேன். இது போன்ற வதந்திகளை யாரும் நம்ப வேண்டாம்” என்று தெரிவித்தார்.
