கோவை வருகை தந்த தமிழ்நாடு முதலமைச்சர் மு.க.ஸ்டாலினுக்கு எதிராக மறியல் போராட்டம் நடத்திய பாஜகவினர் கைது செய்யப்பட்டனர்.
கோவை கொடிசியா வளாகத்தில் சில நாட்களுக்கு முன்பு நடைபெற்ற விவசாயிகள் மாநாட்டில் பிரதமர் நரேந்திர மோடி பங்கேற்றார். அவர் வருகைக்கு எதிர்ப்பு தெரிவித்து தந்தை பெரியார் திராவிடர் கழகம், திராவிடர் கழகம், விடுதலை சிறுத்தைகள் கட்சி உள்பட பல்வேறு முற்போக்கு அமைப்புகள் சார்பில் கறுப்பு கொடி ஆர்ப்பாட்டம் நடைபெற்றது. அத்துடன் பிரதமரின் உருவபொம்மையும் எரிக்கப்பட்டதால் பரபரப்பு ஏற்பட்டது.
இந்த போராட்டத்திற்கு முன்னதாக பாஜக மாநில நிர்வாகிகளில் ஒருவரான வானதி சீனிவாசன் எம்எல்ஏ செய்தியாளர்களிடம் கூறுகையில், “மோடிக்கு எதிர்ப்பு போராட்டம் நடத்தினால், அதே போல முதலமைச்சர் மு.க.ஸ்டாலின் வரும் போது போராட்டம் நடத்தப்படும்” என்று கூறியிருந்தார்.
அந்த வகையில் கோவைக்கு இன்று சென்ற தமிழ்நாடு முதலமைச்சர் மு.க.ஸ்டாலினுக்கு எதிர்ப்பு தெரிவிக்கும் வகையில் பாஜகவினர் கறுப்புக்கொடி ஏந்தி மறியல் செய்தனர். கோவை காந்திபுரம் பகுதியில் நடைபெற்ற போராட்டத்தில் பங்கேற்ற பாஜகவினர் கோ பேக் ஸ்டாலின் என்ற வாசகங்கள் அடங்கிய பதாகைகளை ஏந்தியிருந்தனர்.
இந்த போராட்டத்திற்கு பாஜக இளைஞர் அணி மாநில துணை தலைவர் கிருஷ்ண பிரசாத் தலைமை வகித்தார். அப்போது கோவையின் கனவு திட்டமான மெட்ரோ ரயில் திட்ட விவகாரத்தில் டி.பி.ஆர் வேண்டும் என்றே அறிக்கையை சரி வர தயார் செய்யாததை கண்டித்தும், பெண்களுக்கு பாதுகாப்பு இல்லாத சூழலை கண்டித்தும், போதைப்பொருள் நடமாட்டம், கல்லூரி மாணவர்கள் இடையே அதிகரித்துள்ளதை கண்டித்தும் முழக்கங்கள் எழுப்பப்பட்டன. இந்த போராட்டத்தில் கலந்து கொண்ட 70-க்கும் மேற்பட்டோரை போலீஸார் கைது செய்தனர்.
