தமிழ்நாட்டில் வாக்காளர் பட்டியல் சிறப்பு தீவிர திருத்தப்பணிகளை நாளை முதல்(நவம்பர் 18) புறக்கணிக்க வருவாய்த்துறை ஊழியர் சங்கம் முடிவு செய்துள்ளது.
தமிழ்நாடு, கேரளா உள்ளிட்ட 12 மாநிலங்கள், யூனியன் பிரதேசங்களில் வாக்காளர் பட்டியல் சிறப்பு தீவிர திருத்த பணிகள் (Special Intensive Revision – SIR) தீவிரமாக நடைபெற்று வருகிறது. தமிழ்நாடு முழுவதும் நாளை முதல் சிறப்பு தீவிர திருத்தப்பணி நடைபெறும் என்று அறிவிக்கப்பட்டுள்ளது. ஆனால், நாளை முதல் இப்பணிகளை முழுமையாக புறக்கணிக்க தமிழ்நாடு வருவாய்த் துறை சங்கம் முடிவு செய்துள்ளது. அதீத பணி நெருக்கடி மற்றும் கூடுதல் பணிப்பளுவை களைய வலியுறுத்தி இந்த போராட்டம் அறிவிக்கப்பட்டுள்ளது. இந்த போராட்டத்தில் கிராம நிர்வாக அலுவலர்கள், உதவியாளர்கள் உள்ளிட்ட அனைத்து வருவாய்த் துறை ஊழியர்களும் பங்கேற்பார்கள் என்று அறிக்கையில் அறிவிக்கப்பட்டுள்ளது.
மேலும் எஸ்ஐஆர் பணிகள் தொடர்பான ஆய்வுக் கூட்டங்கள், பணிகள் ஆகியவற்றை நாளை முதல் புறக்கணிப்பதாக அறிவிக்கப்பட்டுள்ளது. இன்று (நவம்பர் 17) மாலை, மாவட்ட ஆட்சியர்களிடம் பெருந்திரள் முறையீடு செய்து, மாவட்ட மற்றும் வட்டத் தலைநகரங்களில் ஆர்ப்பாட்டம் நடத்தவும் சங்கம் திட்டமிட்டுள்ளது. தமிழக தலைமைத் தேர்தல் அலுவலர் மற்றும் இந்தியத் தேர்தல் ஆணையம் தலையிட்டு, சுமூகமான சூழலை ஏற்படுத்தித் தர வேண்டும் என்று கோரிக்கை விடுக்கப்பட்டுள்ளது.
மேலும், எஸ்ஐஆர் பணிகள், வாக்காளர் பட்டியலை சுத்திகரிப்பதற்காக நவம்பர் 4 முதல் தொடங்கியுள்ளது, ஆனால் இது வருவாய்த் துறை ஊழியர்களுக்கு கூடுதல் சுமையை ஏற்படுத்தியுள்ளது என்று சங்கம் குற்றம்சாட்டுகிறது. சங்கத்தின் முக்கிய கோரிக்கைகளில், கூடுதல் பணிப்பளுவை கருத்தில் கொண்டு ஒரு மாத ஊதியத்தை மதிப்பூதியமாக வழங்க வேண்டும் என்று வலியுறுத்தப்பட்டுள்ளது. எஸ்ஐஆர் பணிகள், வாக்காளர் பட்டியலில் இறந்தவர்கள், இடம்பெயர்ந்தவர்கள், தவறான விவரங்கள் ஆகியவற்றை அகற்றுவதை உள்ளடக்கியது. இது டிசம்பர் 9 அன்று டிராஃப்ட் பட்டியல் வெளியீட்டுடன் முடிவடையும். ஆனால், ஊழியர்களின் வழக்கமான பணிகளுடன் எஸ்ஐஆர் பணிகள் இணைக்கப்பட்டதால், பணி நெருக்கடி அதிகரித்துள்ளது என்று வருவாய்த்துறை ஊழியர்கள் குற்றம் சாட்டியுள்ளனர்.
