தஞ்சாவூர் அருகே பள்ளிக்குச் சென்ற ஆசிரியை பட்டப்பகலில் குத்திக்கொலை செய்யப்பட்ட சம்பவம் அதிர்ச்சியை ஏற்படுத்தியுள்ளது.
தஞ்சாவூர் மாவட்டம், மேலக்களக்குடி பகுதியைச் சேர்ந்தவர் முன்னாள் ஊராட்சி மன்றத் தலைவர் புண்ணியமூர்த்தி. இவரது மகள் காவியா(26) இவர் ஆலங்குடி அரசு ஆதிதிராவிட தொடக்கப் பள்ளியில் தற்காலிக ஆசிரியராக பணிபுரிந்து வந்தார். இதே ஊரைச் சேர்ந்தவர் கருணாநிதியின் மகன் அஜித்குமார் (29).
இவரும், காவியாவும் கடந்த 8 ஆண்டுகளாக காதலித்து வந்தனர். இவர்கள் இருவரும் ஒரே சமூகத்தைச் சேர்ந்தவர்கள் என்று கூறப்படுகிறது. இந்நிலையில் பெற்றோர் கட்டாயத்தின் பெயரில் உறவினருக்கு காவியாவை திருமணம் செய்து வைக்க நவம்பர் 23-ம் தேதியன்று நிச்சயதார்த்தம் செய்துள்ளனர்.
ஆனால், இந்த விவரத்தை அஜித்குமாருக்கு தெரிவிக்காமல் அவருடன் காவியா தொடர்ந்து பேசி வந்ததாக கூறப்படுகிறது. நேற்று இரவு 8 மணிக்கு இருவரும் செல்போனில் பேசிக் கொண்டிருந்தபோது தனக்கு நிச்சயதார்த்தம் செய்யப்பட்ட தகவலையும், அதற்கான போட்டோக்களையும் அஜித்குமாருக்கு காவியா வாட்ஸ் அப்பில் அனுப்பியுள்ளார்.
இந்த நிலையில் இன்று (நவம்பர் 27) காவியா வழக்கம்போல் பள்ளிக்கு இருசக்கர வாகனத்தில் சென்றுள்ளார். மாரியம்மன் கோவில் பகுதியில் ராமகிருஷ்ண மடம் அருகே சென்றபோது அவரை அஜித்குமார் வழி மறித்துள்ளார். பின்னர் காவியாவிடம் சண்டையிட்ட அஜித்குமார் மறைத்து வைத்திருந்த கத்தியால் காவியாவை சரமாரியாக குத்தியுள்ளார். இதில் படுகாயமடைந்த காவியா ரத்த வெள்ளத்தில் அதே இடத்தில் உயிரிழந்தார். இச்சம்பவம் குறித்து தகவல் அறிந்ததும் அம்மாபேட்டை போலீஸார் சம்பவ இடத்துக்கு விரைந்தனர்.
காவியாவின் சடலத்தை கைப்பற்றி தஞ்சாவூர் மருத்துவ கல்லூரி மருத்துவமனைக்கு அனுப்பி வைத்தனர். இந்த கொலை வழக்கு தொடர்பாக பாபநாசம் காவல்துறை துணை கண்காணிப்பாளர் தலைமையில் விசாரணை நடைபெற்றது. இதனைத் தொடர்ந்து அஜித்குமாரை போலீஸார் கைது செய்து விசாரணை நடத்தி வருகின்றனர். தஞ்சாவூரில் ஆசிரியை பட்டப்பகலில் கொலை செய்யப்பட்ட சம்பவம் பெரும் அதிர்ச்சியை ஏற்படுத்தியுள்ளது.
