பிஹார் சட்டமன்றத் தேர்தலில் மூன்றாவது இடத்திற்கு தள்ளப்பட்டாலும் வாக்குகள் வித்தியாசத்தில் ஆர்ஜேடி முதலிடம் பிடித்துள்ளது.
பிஹார் சட்டமன்றத் தேர்தல் முடிவுகள் நேற்று வெளியானது. இதில் பாஜக தலைமையிலான தேசிய ஜனநாயக கூட்டணி 202 தொகுதிகளில் மாபெரும் வெற்றி பெற்றுள்ளது. இதில், பாஜக 89 தொகுதிகளிலும், ஜேடியு 85 தொகுதிகளிலும், லோக் ஜனசக்தி கட்சி (ராம் விலாஸ்) 19 தொகுதிகளிலும், இந்துஸ்தானி அவாமி மோர்ச்சா 5 தொகுதிகளிலும், ராஷ்ட்ரிய லோக் மோர்ச்சா 4 இடங்களிலும் வெற்றி பெற்றன.
தேசிய ஜனநாயகக் கூட்டணியை எதிர்த்து போட்டியிட்ட தேஜஸ்வி யாதவின் மகாபந்தன் கூட்டணி 35 தொகுதிகளில் மட்டுமே வெற்றி பெற்றது. இதில், ஆர்ஜேடி 25 தொகுதிகளிலும், காங்கிரஸ் 6 தொகுதிகளிலும், சிபிஐ(எம்எல்) 2 தொகுதிகளிலும், சிபிஎம் 1 தொகுதியிலும் வெற்றி பெற்றன. இந்த இரண்டு கூட்டணிகளிலும் இல்லாத அகில இந்திய மஜ்லிஸ் கட்சி 5 தொகுதிகளிலும், பகுஜன் சமாஜ் கட்சி ஒரு தொகுதியிலும் வெற்றி பெற்றுள்ளன.
பிஹார் சட்டமன்றத் தேர்தல் வெற்றியில் சென்ற முறை முதலிடத்தில் இருந்த ஆர்ஜேடி இம்முறை மூன்றாம் இடத்துக்கு தள்ளப்பட்டது. எனினும், வாக்கு சதவீதத்தில் அது முதலிடம் பிடித்துள்ளது. இந்த தேர்தலில் ஆர்ஜேடி 23 சதவீத வாக்குகளைப் பெற்றுள்ளது. பாஜக 20.08 சதவீத வாக்குகளைப் பெற்று இரண்டாம் இடம் பிடித்தது. ஜேடியு 19.25 சதவீத வாக்குகளைப் பெற்று மூன்றாவது இடத்தைப் பிடித்தது காங்கிரஸ் 8.71 சதவீத வாக்குகளையும், சிராஜ் பாஸ்வான் கட்சி 4.97 சதவீத வாக்குகளையும், அகில இந்திய மஜ்லிஸ் கட்சி 1.85 சதவீத வாக்குகளையும் பெற்றுள்ளன.
