பக்கத்து வீட்டுக்காரரை எரித்துக் கொலை செய்த வழக்கில் 70வயது மூதாட்டிக்கு தேனி மாவட்ட அமர்வு நீதிமன்றம் ஆயுள் தண்டனை விதித்து தீர்ப்பு அளித்துள்ளது.
தேனி மாவட்டம், தேவாரம் பகுதியைச் சேர்ந்தவர் மாரிச்செல்வம். இவரது வீட்டிற்கு அருகில் பெருமாயி(70) என்ற மூதாட்டி வசித்து வந்தார். இவர்கள் இருவரின் வீட்டிற்கும் இடையே இருந்த பொதுச்சுவரில் நீர்க்கசிவு ஏற்பட்டது. இதனால் அவர்கள் இருவருக்கும் இடையே வாக்குவாதம் ஏற்பட்டு மோதலாக மாறியது. இதனால் மாரிச்செல்வம் அங்கிருந்து வீட்டைக் காலி செய்து வேறொரு வீட்டிற்குச் சென்று விட்டார்.
இந்த நிலையில், ஏற்கெனவே குடியிருந்த பகுதியில், உறவினர் ஒருவரின் இறப்பு நிகழ்ச்சிக்கு கடந்த ஆண்டு மாரிச்செல்வம் சென்றார். அப்போது அங்கு வந்த பெருமாயி, தான் மறைத்து வைத்திருந்த பெட்ரோலை மாரிச்செல்வத்தின் மீது ஊற்றி தீ வைத்தார். இதனால் மாரிச்செல்வம் படுகாயமடைந்து தேனி அரசு மருத்துவக் கல்லூரி மருத்துவமனையில் அனுமதிக்கப்பட்டார். அங்கு தீவிர சிகிச்சை பிரிவில் அனுமதிக்கபபட்ட மாரிச்செல்வம் சிகிச்சை பலனின்றி அவர் உயிரிழந்தார்.
இதையடுத்து மூதாட்டி பெருமாயி மீது தேவாரம் காவல் நிலையத்தில் கொலை வழக்கு பதிவு செய்யப்பட்டது. இந்த வழக்கு தேனி மாவட்ட முதன்மை அமர்வு நீதிமன்றத்தில் நடைபெற்று வந்தது. இந்த நிலையில், வழக்கு விசாரணை முடிவற்ற நிலையில் பெருமாயி குற்றவாளி என நீதிபதி சொர்ணம் ஜே.நடராஜன் இன்று தீர்ப்பளித்தார். அதில், பெருமாயிக்கு ஆயுள் தண்டனையும், ரூ.2.000 அபராதமும் விதித்தார். அபராதத் தொகையை கட்டத் தவறினால் மேலும் ஒரு மாதம் சிறைத் தண்டனை விதிக்கப்படும் என்று தீர்ப்பில் தெரிவிக்கப்பட்டுள்ளது.
