அதிமுக முன்னாள் அமைச்சர் செங்கோட்டையன் தவெகவில் இணைந்ததை முன்னிட்டு அக்கட்சியின் தலைவர் விஜய் வீடியோ வெளியிட்டுள்ளார்.
அதிமுக முன்னாள் அமைச்சரான செங்கோட்டையனை அக்கட்சியில் இருந்து எடப்பாடி பழனிசாமி நீக்கினார். இதனால் விஜய் முன்னிலையில் செங்கோட்டையன் தவெகவில் இணைவார் என்ற தகவல் பரவியது. இந்த நிலையில், தனது எம்எல்ஏ பதவியை ராஜினாமா செய்த செங்கோட்டையன், பட்டினப்பாக்கத்தில் உள்ள விஜய் அலுவலகத்துக்கு சென்றார். அங்கு அவரை சந்தித்து நீண்டநேரம் பேசினார். இதனால் அவர் தவெகவில் இணைவது உறுதியானது.
இந்த நிலையில் பனையூரில் உள்ள தவெக அலுவலகத்திற்கு செங்கோட்டையன் இன்று சென்றார். அவரை தவெக நிர்வாகிகள் வரவேற்றனர். இதன் பின் விஜய் முன்னிலையில் தவெகவில் அவர் இணைந்தார். இதன் பின் அவரது ஆதரவாளரான முன்னாள் எம்.பி சத்யபாமா உள்பட பலர் விஜய் முன்னிலையில் தவெகவில் இணைந்தனர்.
இதனைத் தொடர்ந்து தவெக தலைவர் விஜய் வீடியோ ஒன்றை வெளியிட்டுள்ளார். அதில், “அனைவருக்கும் வணக்கம். ஒரு 20 வயது இளைஞராக இருந்தபோதே எம்,ஜி.ஆரை நம்பி அவருடைய மன்றத்தில் சேர்ந்தவர். அந்த சின்ன வயதில் எம்எல்ஏ என்ற பொறுப்பை ஏற்றவர். அந்த இயக்கத்தின் இருபெரும் தலைவர்களுக்கு பெரும் நம்பிக்கைகுரியவராக அரசியல் களத்தில் இருந்தவர்.
இப்படி 50 வருடமாக ஒரே இயக்கத்தில் இருந்த அண்ணன் செங்கோட்டையனின் அரசியல் அனுபவமும், களப்பணியும் தமிழக வெற்றிக் கழகத்துக்கு உறுதுணையாக இருக்கும் என்ற நம்பிக்கையுடன் நம்முடன் பணியாற்ற வந்த அவரையும், அவருடன் வந்தவர்களையும் மக்கள் பணியாற்ற வரவேற்கிறேன். நல்லது மட்டுமே நடக்கும். நல்லது மட்டுமே நடக்கும்/ வெற்றி நிச்சயம்” என்று பேசியுள்ளார்.
