ஹரியாணாவில் 25 லட்சம் வாக்குகள் திருடப்பட்டுள்ளதாக காங்கிரஸ் மூத்த தலைவரும், மக்களவை எதிர்க்கட்சி தலைவருமான ராகுல் காந்தி தெரிவித்தார்.
புதுடெல்லியில் உள்ள காங்கிரஸ் தலைமையகத்தில் மக்களவை எதிர்க்கட்சி தலைவர் ராகுல் காந்தி இன்று செய்தியாளர்களைச் சந்தித்தார். அப்போது அவர் கூறுகையில், “ ஹரியாணா சட்டமன்ற தேர்தலின்போது அனைத்து கருத்துக்கணிப்புகளும், கள நிலவரங்களும் காங்கிரஸ்தான் வெற்றிபெறும் என சொன்னது. ஆனால், முறைகேடுகள் நடந்ததால் காங்கிரஸால் வெற்றிபெற முடியவில்லை. ஹரியாணாவில் தபால் வாக்குகளின் எண்ணிக்கை தேர்தல் முடிவுகளுடன் பொருந்தவில்லை. ஹரியானாவில் நடந்தது ஆட்சித் திருட்டு. ஜென் ஸீ தலைமுறையினர் வாக்குத் திருட்டு குறித்து புரிந்துகொள்ள வேண்டும். வாக்குத் திருட்டு மூலம் ஜென் ஸீ இளம் வாக்காளர்களின் எதிர்காலம் அழிக்கப்படுகிறது.
ஹரியாணாவில் 25 லட்சம் வாக்குகள் திருடப்பட்டுள்ளன. ஹரியானாவில் பிரேசில் பெண் மாடலின் படம் பல பெயர்களில் வாக்காளர் பட்டியலில் இருந்தது. ஹரியாணாவில் உள்ள 2 கோடி வாக்காளர்களில், 25 லட்சம் வாக்குகள் திருடப்பட்டன. ஹரியாணாவில் 5,21,619 போலியான வாக்குகள் இடம்பெற்றிருந்தன. ஒரு தொகுதியில், ஒரே புகைப்படத்தை வைத்து 100 வாக்குகள் திருடப்பட்டன.
ஹரியாணாவில் பல வாக்குச்சாவடிகளில் 200, 100, 50 என வாக்குகள் திருடப்பட்டன. 1,24,177 வாக்காளர்களின் புகைப்படங்கள் போலியானவை என்பதை கண்டறிந்துள்ளோம். அதுபோல ஒரே புகைப்படம், ஒரே முகவரியில் பல வாக்காளர்கள் இடம்பெற்றுள்ளனர். இதுகுறித்து முக்கிய சிசிடிவி ஆவணங்களை தேர்தல் ஆணையம் அழித்துவிட்டது. போலி புகைப்படங்களை நீக்கும் மென்பொருள் வசதி தேர்தல் ஆணையத்திடம் உள்ளது. பின்னர் எப்படி இதுபோல நடக்கிறது?. ஒரே நபர் ஒரே நாளில் பல வாக்குகளை செலுத்த தேர்தல் ஆணையம் எப்படி அனுமதித்தது?. காங்கிரஸின் வெற்றியை பாஜகவின் வெற்றியாக மாற்றும் சதி நடைபெற்று வருகிறது.
ஹரியானாவில் தேர்தலுக்கு முன்பு 3.5 லட்சம் வாக்குகள் நீக்கப்பட்டன. நாடு முழுவதும் வாக்குத் திருட்டு பெரிய பிரச்னையாக மாறி வருகிறது. வாக்குத் திருட்டு மூலம் பிஹாரிலும் ஆட்சியை பிடிக்க பாஜக முயற்சி செய்கிறது. ஜனநாயகத்தை அழிப்பதில் பாஜகவின் புதிய ஆயுதம் வாக்காளர் பட்டியல் சிறப்பு தீவிர திருத்தம்.” என்றார்.
