கட்சி விவகாரத்தில் அன்புமணி கூறுவது அனைத்தும் பொய்தான் என்று பாமக நிறுவனர் டாக்டர் ராமதாஸ் கூறினார்.
பாட்டாளி மக்கள் கட்சி நிறுவனர் டாக்டர் ராமதாஸ்க்கும், அவரது மகன் டாக்டர் அன்புமணிக்கும் ஏற்பட்ட கருத்து வேறுபாடு கட்சி இருகுழுக்களாக இயங்கி வருகிறது. இந்த நிலையில், பாமக தலைவர் அன்புமணி தான் என இந்திய தேர்தல் ஆணையம் நேற்று அறிவித்தது. அத்துடன் அன்புமணி தலைவர் இல்லை என்று ராமதாஸ் அளித்த மனுவையும் நிராகரித்து விட்டது. இந்த நிலையில், தேர்தல் ஆணையம் செய்தது ஜனநாயக படுகொலை என்றும், தேர்தல் ஆணையத்தை கண்டித்து டெல்லியில் பாமக சார்பில் போராட்டம் நடைபெறும் என்று அக்கட்சியின் கவுரவ தலைவர் ஜி.கே.மணி கூறியிருந்தார்.
இந்த நிலையில், எனது உரிமையை ஒருபோதும் விட்டுக்கொடுக்க முடியாது என டாக்டர் ராமதாஸ் கூறியுள்ளார். இதுதொடர்பாக நிர்வாகிகள் மத்தியில் டாக்டர் ராமதாஸ் பேசினார். அப்போது அவர் பேசுகையில், “அன்புமணியின் பாமக தலைவர் பதவிக்காலம் முடிந்துவிட்டது. தேர்தல் ஆணையத்தை பணம் கொடுத்து அன்புமணி விலைக்கு வாங்கிவிட்டார். எனது உரிமையை ஒருபோதும் விட்டுக்கொடுக்க முடியாது. எனது உரிமையை யாராலும் திருட முடியாது. இனி வெல்லப்போவது ராமதாஸ் தான்.
சட்டமன்றத்தில் பாமக பிரநிதித்துவம் குறைந்ததற்கு காரணம் அன்புமணியின் செயல்பாடுகளால் தான். அன்புமணியால் பணம் கொடுத்து தான் கூட்டம் கூட்ட முடியும். நான் உருவாக்கிய கட்சியை அன்புமணி அபகரிக்க முயற்சி செய்கிறார். கட்சி விவகாரத்தில் அன்புமணி கூறுவது அனைத்தும் பொய்தான்” என்றார்.
