சிம்லாவில் பாறையில் மோதி 300 மீட்டர் பள்ளத்தில் விழுந்து ஜேசிபி ஓட்டுநர் ஆபத்தான நிலையில் மருத்துவமனையில் அனுமதிக்கப்பட்டுள்ளார்.
இமாச்சலப் பிரதேசத்தின் சிம்லா மாவட்டத்தில் உள்ள குமார்செய்ன் காவல் நிலையப் பகுதியின் பராடாவில் உள்ள சாலையில் இருந்து இடிபாடுகளை ஜேசிபி இயந்திரம் மூலம் ஓட்டுநர் அகற்றிக் கொண்டிருந்தார். அப்போது ஒரு பெரிய பாறை மலையிலிருந்து விழுந்து இயந்திரத்தின் மீது மோதியது. இதனால் ஜேசிபி கட்டுப்பாட்டை இழந்து சுமார் 300 மீட்டர் ஆழமுள்ள பள்ளத்தில் விழுந்தது.
இந்த விபத்தில் இயந்திரத்தின் ஓட்டுநர் பலத்த காயமடைந்தார், அவர் மிகுந்த முயற்சிக்குப் பிறகு பள்ளத்தில் இருந்து மீட்கப்பட்டு மருத்துவமனையில் அனுமதிக்கப்பட்டார். அவருக்கு தலை மற்றும் முதுகுத்தண்டில் பலத்த காயம் ஏற்பட்டுள்ளது. அவரது நிலைக்கவலைக்கிடமாக உள்ளதால் ஐசியுவில் அவர் வைக்கப்பட்டுள்ளார்.
இந்த விபத்தால், சிம்லா-ராம்பூர் நெடுஞ்சாலை போக்குவரத்து நெரிசலில் சிக்கிக் கொண்டது. இதனால் சாலையின் இருபுறமும் நீண்ட வாகனங்கள் வரிசை கட்டி நின்றன. இதன் காரணமாக பயணிகள் மணிக்கணக்கில் சிக்கித் தவித்தனர், இடிபாடுகளை அகற்றும் பணி மீண்டும் தொடங்கப்பட்டுள்ளது. மழை காரணமாக, மலைகளில் இருந்து பாறைகள் தொடர்ந்து விழுந்து வருவதாகவும், இதுவே இந்த விபத்துக்கு மிகப்பெரிய காரணமாக அமைந்துள்ளதாகவும் முதற்கட்ட விசாரணையில் தெரியவந்துள்ளது. தற்போது, மலைப்பாங்கான பகுதிகளில் பயணிக்கும்போது மக்கள் மிகவும் எச்சரிக்கையாக இருக்கவும், வானிலைத் துறையின் எச்சரிக்கையை தீவிரமாக எடுத்துக்கொள்ளவும் மாவட்ட நிர்வாகம் வேண்டுகோள் விடுத்துள்ளது.
